Унгарската владејачката партија Фидес ја одложи парламентарната дебата и гласање за контроверзниот закон со цел ограничување на странското финансирање за медиумските организации и невладините организации, изјави лидерот на парламентарната група.

Законот, насловен како „Транспарентност во јавниот живот“, беше предложен минатиот месец од пратеник од партијата на премиерот Виктор Орбан и ќе овозможи надзор, ограничување, казнување, па дури и забрана на медиуми и невладини организации за кои владата смета дека претставуваат закана за суверенитетот на земјата.

Законот предизвика улични протести, остри критики од групите за човекови права и предупредувања од Европската комисија и Советот на Европа. Европската комисија минатиот месец побара нацрт-законот да се повлече од законодавната постапка, објавува Еуроњуз.

Орбановиот закон за транспарентност под лупа на ЕУ

Законот, кој критичарите го споредија со рускиот закон за „странски агенти“, требаше да се гласа кон средината на јуни и се очекуваше да биде усвоен бидејќи Фидес има двотретинско мнозинство во парламентот.

Сепак, пратеникот на Фидес, Мате Кочиш, рече дека партијата сè уште дебатира „кои правни механизми треба да се користат за заштита на суверенитетот“.

Според него, нацрт-законот добил бројни предлози за измени во последните недели, вклучително и од Унгарската банкарска асоцијација, Здружението на огласувачи, Канцеларијата на претседателот на Републиката, Адвокатската комора и Здружението на издавачи на весници.

Притисокот дополнително се засили во 2023 година со основањето на Канцеларијата за заштита на суверенитетот, тело што истражува организации и медиуми за кои се смета дека се под странско влијание.

Орбан, за кого анкетите покажуваат дека се соочува со својот најголем предизвик пред изборите следната година, тврди дека странските сили – првенствено од Соединетите Американски Држави и соседна Украина, се обидуваат да влијаат врз јавното мислење преку независни медиуми и антикорупциски организации со цел да го соборат од власт.

Организациите силно ги негираат тврдењата, инсистирајќи дека ја работат својата работа професионално и во име на јавниот интерес.