Машката сениорска одбојкарска репрезентација утре (среда) во 13:30 часот во хотелот „Горан Пандев“ во Струмица и официјално ги започнува подготовките за настапот во Златната Европска лига 2025, каде третпат по ред ќе биде дел од ова престижно континентално натпреварување.

Селекторот Јошко Миленкоски повика 16 одбојкари на кои ќе смета за првата летна репрезентативна акција. На првиот собир ќе се појават 15 од нив, додека Михајло Мирасчиев поради приватни причини ќе се приклучи попладнето, директно на првиот тренинг.

Според планот, репрезентацијата ќе ја одработи првата фаза од подготовките во салата „Парк“ во Струмица, по што заминува за Словенија, каде на 24 и 25 мај ќе одигра два контролни натпревари против Хрватска во Марибор.

Оваа година во Златната Европска лига ќе учествуваат 12 репрезентации: Македонија, Чешка, Португалија, Романија, Финска, Хрватска, Грција, Шпанија, Летонија, Словачка, Црна Гора и Израел. Како и претходно, ќе се игра според „швајцарски систем“, преку три турнири, при што секоја селекција ќе биде домаќин на еден од нив.

Македонија стартува од 6 до 8 јуни во Братислава против домаќинот Словачка и Финска. Следниот турнир од 13 до 15 јуни се игра во Рига, каде нашите одбојкари ќе се сретнат со Летонија и Грција. Круна на настапите ќе биде турнирот во Струмица од 20 до 22 јуни, каде Македонија ќе биде домаќин на Црна Гора и Израел.

По одигрувањето на сите турнири ќе биде составена заедничка табела, а најдобрите четири селекции ќе обезбедат пласман на финалниот турнир што ќе се игра на 5 и 6 јули во Брно, Чешка.