Машката одбојкарска репрезентација на Македонија влегува во завршниот дел од подготовките за настапот во ЦЕВ Европската Златна лига, која за нашите репрезентативци започнува овој викенд со турнир во словачката престолнина Братислава.

По две недели напорна работа, селекторот Јошко Миленкоски им даде краток одмор на одбојкарите, па викендов имаа два дена слободни. Но веќе од понеделник изутрина, тимот се врати во Струмица, каде акцентот сега е ставен на видео анализи и детална тактичка подготовка за првите предизвици во групната фаза.

„По две недели напорна работа викендов им дадов два дена слободни на играчите и од понеделник рано наутро се вративме во Струмица и продолжуваме со подготовките. Влегуваме во онаа популарно наречена финална фаза. Почнавме со видео анализа на противниците и тактичка подготовка. Малку пријателски натпревари се играа периодов, но имаме некои информации и работиме според нив. Нормално, прво се фокусираме на Финска со оглед на тоа дека со нив го отвораме натпреварувањето“, објаснува селекторот Миленкоски и продолжува: „Најважно во моментов е дека сите се здрави, расположени за работа и дека се тече според планот. Се надевам дека така ќе биде и во следните три недели.“

Македонската репрезентација во петок изутрина патува за Братислава, каде што во сабота (6 јуни) од 15 часот го игра првиот натпревар против Финска, во салата „Гопас Арена“. Веќе следниот ден, на 8 јуни, нашите одбојкари повторно ќе излезат на терен во истиот термин против селекцијата на Словачка.