Од Основното јавно обвинителство сè уште истражуваат како се случи грозоморниот настан минатата седмица на 11 април кога агресивни кучиња од расата булмастиф убија 8-годишно дете кое од својот двор влегло во соседниот двор каде што биле кучињата.

– Надлежниот јавен обвинител издава повеќе наредби и презема дејствија за да изврши проверки на сите околности во врска со конкретниот настан, меѓу кои и на оние што ги наведувате во вашите прашања. Јавното обвинителство го разбира интересот на јавноста за настанот и вознемиреноста што тој ја предизвика, но во оваа фаза на постапката, додека не бидат завршени сите проверки, не сме во можност да споделиме детали за преземените дејствија – одговорија од ОЈО на прашањата на „Слободен печат“.

„Слободен печат“ упати повеќе прашања до Обвинителството за настанот кој е од висок јавен интерес за тоа дали истрагата веќе утврди што точно се случило. Дали детето ја прескокнало оградата и ако успеало да ја прескокне, дали Обвинителството ќе ја смета таа ограда за соодветно обезбедување на просторот во кој се чуваат крволочни кучиња. Дали навистина детето влегло во боксот кај кучињата, како што се зборува по социјалните мрежи и ако влегло, како е можно боксот да биде толку необезбеден за да може 8-годишно дете да го отвори?

Прашавме и ако едното кучето било старо, полуслепо и полуглуво, како што се зборува, дали како такво се смета за опасност за околината, затоа што од светски искуства е познато дека булмастифите, како и други сорти кучиња на старост се почувствителни, поанксиозни и агресивни, а има и примери кога такви постари кучиња ги нападнале и убиле своите сопственици, како на пример во 2010 година кога три булмастифи во Словенија го растргнале на парчиња својот сопственик, па одгледувачот од Пинтија, Н.Г., кој е стручен за оваа раса, тоа секако требало тоа да го знае и да го обезбеди подобро животното.

„Слободен печат“ праша и дали има основи за кривично да се гони сопственикот Н.Г., и дали ОЈО смета дека тој ги презел сите мерки за да не се случи ваков грозоморен настан, затоа што поверојатно е дека возрасното куче го користел за одбрана на имотот, а не за носење на изложби, оти 12 годишен полуслеп и полуглув булмастиф не се носи на изложби. Особено што кучето извршило крајно агресивна одбрана на имотот, затоа што го нападнало и изгризало несреќното дете директно за врат, му ја искинало каротидата, па дали ЈО смета дека тоа е соодветна одбрана на имот од куче, наместо кучето да предупредува и да брани имот со лаење? Дали има кривично дело предизвикување на општа опасност? „Слободен печат“ праша и дали е распитан сопственикот на кучињата Х.Г. од обвинител или само дал изјава во полиција?

Нè интересираше и дали имал легална одгледувачница на оваа опасна сорта кучиња, дали ги продава низ Македонија, кој обезбедува тренинг на продадените кучиња и дали е обезбедена нивна следливост, оти тие неретко се користат и за борби?

Јавното обвинителство засега не открива никакви детаљи од истрагата.

Детаљи не откриваат ниту од Агенцијата за храна и ветеринарство, каде двете кучиња кои го извршија нападот врз момчето се уште се на набљудување за беснило и агресивност. Ни рекоа дека надзорот над кучињата ќе трае 15 дена, по што ќе досенат одлука и ќе ја соппштат на јавноста. Не дадоа коментар на прашањето дали ако кучињата немаат беснило и го поминат тестот за социјализација ќе му бидат вратени на сопственикот и само ќе бидат заведени во Регистарот на опасни кучиња.

За несреќниот настан досега сопственикот на кучињата не се огласи во јавноста.