Италијанските обвинители одлучија: На славната инфлуенсерка ќе ѝ се суди за проневера на парите за лекување деца болни од рак
Случајот на една од најпознатите Италијанки, Кјара Ферањи, продолжи откако обвинителството ја заврши истрагата против неа.
Препорачано
Италијанката Кјара Ферањи некогаш беше непозната девојка од соседството, а денес е инфлуенсерка со армија следбеници, сопственичка на три компании и модна икона.
Меѓутоа, пред неколку месеци, нејзината блескава кариера остана во сенка на немилите настани, поради што стана предмет на правна и етичка дебата каква што светот на инфлуенсерите не памети.
Приказната сега доби епилог, бидејќи обвинителите во Милано ја затворија истрагата против неа, обвинувајќи ја за кривично дело тешка измама и ќе побараат судење, објави водечката италијанска новинска агенција АНСА.
Оваа вест шокираше многу нејзини обожаватели, па покрена бран дискусии за етиката на маркетингот на социјалните мрежи.
Да потсетиме, обвинителството тврди дека маркетиншките кампањи биле дизајнирани со намера да ги доведат потрошувачите во заблуда, создавајќи лажна врска помеѓу купувањето на рекламираните производи и добротворните акции.
Се работи за следното… Кјара Ферањи, која има 28 милиони следбеници на Инстаграм, требаше да плати казна од 1.075.097 евра, поради тврдењето дека со продажбата на нејзиното „дизајнерско“ пандоро (италијански десертен леб) ќе помогне во финансирањето на детската болница во Торино, Италија.
Имено, компанијата која го произведува пандорото – „Балоко“ направила еднократна донација од 50.000 евра пред почетокот на кампањата, така што сумите од продажбата на колачите немале дополнителна врска со донациите на болницата во Торино.
Во центарот на истрагата беа случаите на наводно лажно рекламирање поврзано со продажба на производи по значително зголемени цени (9 евра по парче, додека пазарната цена на споредливите производи била само 3,7 евра), а сето тоа како дел од хуманитарна кампања за собирање средства за лекување на малигни болести на коските во специјалната болница „Регина Маргерита“ во Торино. Поточно, станувало збор за продажба на Балоко „Розов Божиќ“ панетоне колачи и велигденски јајца „Долчи Прециози“, што се одвивала помеѓу 2021 и 2022 година.
Добивката на Кјара Ферањи од овие кампањи изнесувала нешто повеќе од 2,2 милиони евра, но таа не е единствената инволвирана во скандалот. Покрај неа, под истрага беа и нејзиниот поранешен близок соработник Фабио Дамато, Алесандра Балоко, сопственичка на компанијата која произведува панетоне и Франко Канило од компанијата „Долче Прециози“.
Инфлуенсерката Кјара и компаниите поврзани со неа веќе мораа да платат парична казна за сè. Поточно, целата незаконски стекната заработка ја уплатиле во државниот буџет, но државниот правобранител очигледно не бил задоволен со тоа.
Адвокатите на славната инфлуенсерка брзо реагираа на заклучокот од истрагата, тврдејќи дека случајот нема кривична важност и дека спорните прашања се веќе решени пред Агком, италијанското регулаторно тело за комуникации. Тие изјавија дека нивната клиентка има доверба во судството и верува дека нејзината невиност ќе се докаже во најкраток можен рок, што сугерира дека најверојатно ќе ги оспорува обвиненијата и ќе се обиде да докаже дека немало намера да измами.
Поради овој скандал, се распадна и нејзиниот брак со италијанскиот музичар Федез.
Додека чекаме понатамошни случувања, едно е сигурно – светот на инфлуенсерското рекламирање никогаш нема да биде ист. Овој случај служи како потсетување дека со голема моќ доаѓа и голема одговорност и дека во дигиталната ера, каде што информациите се шират со брзина на светлината, транспарентноста и интегритетот мора да бидат на прво место.
Таа е најмоќната инфлуенсерка во светот и носи чанта од 432.000 долари!
