Се чувствувам виновен, многу се каам. Свесно го давам признанието. Никој не ме уценувал. Јасно ми е дека ќе следи санкција. Ова денеска во судница во Кривичниот суд го кажа возачот Јордан Ѓоргиев кој ја стори сообраќајката кај „Сити мол“, а во која загина младата Викторија Николова на 22 јануари годинава.

Адвокатот Душко Јанковиќ, кој го застапува возачот Јордан Ѓоргиев, предложи да не се изведуваат докази за сообраќајката, туку само оние кои се важни за одредување на висината на казната. Судијката Љубинка Башевска тоа го прифати, бидејќи обвинетиот призна вина.

– Со свое име, во име на семејството Ѓоргиеви, како и во име на Јордан, изразувам длабоко сочувство кон семејството на починатата и длабоко сочувство кон оштетениот Леонид. Неспорен е фактот дека сме во судницава токму поради склучената сообраќајна незгода која заврши на трагичен начин. Обвинетиот Јордан во текот на целата постапка, од исказот даден наредниот ден по случката, не го негираше настанот, ниту пак неговото учество и вина во истиот. Во ниеден момент не спореше ниту пак тврдеше дека тој не го управувал возилото или пак дека сакал да побегне од настанот. Целиот тек на неговото издржување на притворот е поминат и се уште е во фаза на каење за таа мала небрежност или невнимание кое што можеби е секунда или две – изјави Јанковиќ.

Адвокатката Билјана Андонова, која го застапува Леонид Даов, момче на починатата Викторија, кажа дека ќе бара имотно правно побарување.

– Предјавувам имотно правно побарување во име на оштетениот. Бараме од судот за остварување на имотно правно побарување во граѓански спор“, кажа Андонова.

Обвинението за Јордан Ѓоргиев го поднесе скопското обвинителство по сообраќајката на раскрсницата кај „Сити мол“. Според обвинението, тој возел со брзина од 67,3 километри на час, што е за 17,3 километри на час поголема од максимално дозволената, не застанал иако видел дека има пешаци и ја прегазил Викторија, заедно со нејзиното момче Леонид Даов кој здоби полесни повреди.

Обвинителот Мишо Илиевски во завршни зборови посочи дека неспорно е докажана вина и посочи дека се надева дека со казната ќе се превенира за други вакви сообраќајќи, случени со прекршување на сообраќајните правила, а адвокатката на повредениот Леонид Даов, кажа дека признанието на вина не треба да биде олеснителна околност.

– Очекувањето на јавното обвинителство е дека судот ќе определи санкција во границите на казната предвидена за кривичното дело за кое се обвинува Јордан Ѓоргиев. Со оваа кривична санкција искрено се надевам дека ќе биде задоволена правдата пред се во делот на генералната превенција во овој вид на криминалитет, бидејќи во последно време сме сведоци на жал се позачестени вакви незгоди, каде како последица го имаме губењето на човечки животи. Очекувањето на обвинителството е да се определи санкција со која ќе се остварат целите на казнувањето. Предлагам да му се определи кривична казна забрана за управување со моторно возило – изјави обвинителот.

Адвокатот на семејството Николови, кажа дека тие не добиле извинување од адвокатот, семејството и обвинетиот.

– Сакаме да потенцираме дека денеска е 76 ден од смртта на Викторија и во однос на признавањето на вина, сметаме дека истото е институционално. Затоа што во текот на овој период ниту семејството на обвинетиот, а и самиот тој, во ниту една форма, се нема извинето, изразено сочувство или искрено да се покае. Сакаме судот ова да го има во предвид и да донесе казна како што треба за да покажеме владение на правото сразмерна на делото кое е сторено – кажа адвокатот Владимир Михајловиќ

Адвокатот Душко Јанковиќ, кој го застапува обвинетиот Јордан Ѓоргиев го опиша неговиот живот. Кажа што проживува, го спомена и каењето.

– Чинот на признанието на Јордан мислам дека е единствен начин за таа трагедија се ублажи и за двете страни, но и да денеска ја утврдиме правата вистина за целиот настан. Кога велам да се утврди правата вистина, не мислам на утврдување на фактичка состојба, но мислам, на сите невистини, лаги, инсинуации, злонамерни пишувања, колнења, клевети и закани со убиство искажани кон обвнетиот Јордан, неговото семејство, па и лично кон мене како негов бранител, а искажани преку социјалните мрежи од првиот момент на случената трагедија од страна на квази добротвори, квази правници, кои цело време изведуваа квази судии седејќи позади тастатурата пред компјутер, а вклучен „Фејсбук“ и неограничено ги лечеа своите комплекси, а притоа, не сфаќајќи дека се всушност морални накази и чудовишта кои немаа почитување спрема никого и со цел да ова и така не мала несреќа, уште повеќе ја зголемат, а што е најважно, немаа почит и спрема семејството на оштетените. Родителите на Јордан се разведени уште во 2007 година и од тогаш се самохрано семејство. Неговиот татко, како за пример, живее веќе 17 години во Гевгелија и е невработен. Кога го опишуваме карактерот или психолошкиот профил на животот на младиот Јордан, неговата клучна улога во семејството е домаќинската улога и преземањето на улогата на неговиот татко. Јордан е ко-кредитобарател на неговата мајка која е кредитобарател, за кредит, за стан каде што денеска живеат, со рок на исплата од 30 години. Јордан на свое име и со двајца жиранти има подигнато уште еден кредит. Тоа покажува дека покрај тоа што студира, тој работи, зема плата од 45 илјади денари и заедно со неговата мајка го водат семејството – нагласи адвокатот и го замоли судот да биде благ спрема Јордан при одмерување на казната.