Денеска својот настап го имаше и последниот македонски спортист на Летните олимписки игри во Токио, нашиот најдобар борач Магомедгаджи Омардибирович Нуров кој пред турнирот се одвојуваше во Топ 4 фаворити за освојување на медал.

А одлично стартуваше нашиот натпреваруч на турнирот во борење во категоријата до 97 килограми слободен стил, во осминафиналето со 5:0 го совлада Саадуи Мохамед од Тунис.

Во четвртфиналето се сретна против кубанскиот шампион Ринерис Салас Перез кој започна со триумф над Белорусинот Александар Хуштин (4:3).

Нуров ја имаше фаворитската улога против Салас Перез, но во борбата за пласман во полуфиналето загуби од Кубанецот со 6:4.

На почетокот на борбата, Нуров имаше одличен зафат, но кубанскиот борач изведе против акција и доби 4 поени. Во втората рунда, Нуров тргна на сè или ништо и за кратко време имаше два одлични зафати за кои доби по два поени и изедначи на 4:4.

На околу 20 секунди пред крајот на борбата Нуров тргна во акција, но повторно кубанскиот борач изведе против зафат и доби два поени кои му беа доволни да извојува победа против најдобриот македонски борач.

Останува да видиме дали Нуров ќе се пласира во репасажот и борбата за медал, во зависност од резултатот на кубанскиот борач во полуфиналето на Олимпискиот боречки турнир.

Доколку Кубанецот слави против најголемиот фаворит за златото во оваа категорија, Абдулрашид Садулаев од Рускиот олимписки комитет, (борбата е закажана денеска 11.15 часот по македонско време), тогаш Нуров повторно ќе биде во трка за медал, ќе му требаат две победи до бронзата.

Садулаев уште во неговите први две борби докажа зошто е фаворит за златниот медал, најпрвин славеше со 5:0 против Шариф Шерифов од Азербејџан, а потоа и со 10:0 против Грузиецот Елизбар Одикадзе.