Италијанскиот фудбал од оваа сезона влегува во нова ера на комуникација и транспарентност, судиите во Серија А и останатите натпреварувања ќе имаат можност јавно да ги објаснуваат своите одлуки донесени со помош на ВАР технологијата. Информацијата ја потврди првиот човек на судиската комисија во Италија, Џанлука Роки.

Новитетот, кој веќе беше предвиден за финалните натпревари од Купот на Италија во минатата сезона, тогаш не беше ставен во функција бидејќи не се појави потреба за ВАР интервенции кои бараат директна комуникација. Сепак, системот веќе беше тестиран на неодамна одржаното Светско клупско првенство и сега ќе се користи во сите натпреварувања во Италија.

„Голема новост за оваа сезона ќе биде објаснувањето на теренот. Судиите по проверката на ВАР ќе можат да ги објаснат своите одлуки директно на публиката која е на стадионот и пред малите екрани. Ова е важен чекор напред во комуникацијата бидејќи веќе неколку години наназад бараме поголема транспарентност. Сега објаснување ќе можеме да добиеме директно и во реално време. Имаме одбрана група на судии и сакаме да обезбедиме дека јазикот што ќе се користи ќе биде заеднички“, изјави Роки.