На сцената во „Јавна соба“ („Public Room“), новооснованата група „Трето колено“ на 3 април (четврток), со почеток во 21 часот, премиерно ќе ја изведе својата нова авторска музика, сплетена од Дејан Петровиќ (Чапе), Дејан Марковски (Деки) и Пеце Трајковски (Брада). Бендот ќе понуди иновативна фузија на дистописки шлагери и вампирски теми, во која минатото, сегашноста и иднината се преплетуваат во 20 музички приказни.

Во време кога музичките жанрови изгледаат исцрпени, новата свежина доаѓа од подножјето на Пелистер, носејќи со себе иновативен инструментално-вокален калеидоскоп. Бендот е составен од искусни музичари: Дејан Петровиќ – Чапе (вокал и гитара), Дејан Марковски – Деки (вокал и гитара) и Пеце Трајковски – Брада (перкусии и хармоника). Тие во оваа фузија на будни соништа создаваат сосема нова музичка димензија.

– Во геометријата на битието, под сенката на Пелистер, во дом над облаците, три сродни набљудувачи на животот ги сплетија своите огледани искуства во совршениот круг на сонот, каде што се отсликани трите точки на времето: минатото, сегашноста и иднината. Дистописките рефрени на Чапе, сонливиот надреализам на Деки и политактниот погон на Брадата ткаат современа смисла, како сенки на реалноста што раскажуваат во полумрак – истакнуваат од „Трето колено“.

Концертот во „Јавна соба“ ќе понуди 20 нови композиции, а публиката ќе има уникатна можност да искуси една поинаква концертна сценографија, каде што стиховите ќе бидат изложени на бината, создавајќи интимна атмосфера за заедничко нурнување во новата музичка приказна.