Новинарите ширум Еквадор биле цел на експлозивни направи испратени преку пошта. Водителот Ленин Артиеда, бил повреден кога го отворил пликото во редакцијата, пренесува „Би-Би-Си“.

Тој рече дека експлозивната направа изгледала како УСБ. Го вклучил во компјутерот и тој се активирал. Одделот на еквадорскиот јавен обвинител потврди дека отворил истрага за тероризам за писмата кои стигнале до најмалку пет различни редакции низ Еквадор.

Владата ги осуди нападите, опишувајќи ја слободата на изразување како „право што мора да се почитува“.

„Секој обид за заплашување на новинарството и слободата на изразување е одвратна акција што треба да се казни со сета строгост на правдата“, се вели во соопштението.

Министерот за внатрешни работи, Хуан Запата, рече дека сите уреди биле испратени од истиот град. Три биле испратени до медиумите во Гвајакил, а двајца во главниот град Кито.

Додека Артиеда бил повреден од уредот, другите испратени УСБ уреди не експлодирале или никогаш не биле отворени.

Полицијата извршила контролирано детонирање на еден од апаратите испратени до телевизијата ТЦ, потврдија од обвинителството. Шефот на форензичката наука на Еквадор рече дека тие содржеле експлозиви од „воен тип“.

Еквадор доживеа зголемување на насилството, за кое неговиот претседател Гилермо Ласо рече дека е резултат на конкуренцијата меѓу бандите за шверц на дрога за територија и контрола.

Земјата на Андите, која се користи како рута за шверц на кокаин од соседните Перу и Колумбија, забележа нагло зголемување на убиствата и криминалот поврзан со банди во последните месеци.

Гвајакил, вториот по големина град во Еквадор, каде беа испратени три од експлозивите, доживеа драматично ниво на насилство, вклучувајќи обезглавени тела што висат од пешачки мостови и смртоносни затворски немири меѓу ривалските банди.