Новата сезона во Националната опера и балет почнува со сценската кантата „Кармина бурана“ од Карл Орф
Националната опера и балет ќе ја отвори новата сезона со моќната и возбудлива сценска кантата „Кармина бурана“ од германскиот композитор Карл Орф, на 16 октомври, со почеток во 20 часот. Билетите за претставата се распродадени.
Препорачано
Диригент на претставата е Иван Еминовиќ, кореографијата и либретото се на Кан Арслан од Турција, сценограф е Миодраг Табачки (Србија), костимограф на балет е Гизем Бетил (Турција), костимограф на опера е Елена Дончева, хор-мајстори се Јасмина Ѓорѓеска и Ѓургица Дашиќ, концерт-мајстор е Верица Ламбевска, а репетитори на балетот се: Горан Божинов, Володимир Борисов (Украина), Кире Павлов, Дафина Данилоска Кочевска, Саша Евтимова, Бобан Ковачевски.
Во претставата ќе настапат оперските солисти Наде Талевска (сопран), Благој Нацоски (баритон) и Денис Димоски (контра-тенор).
Балетските солисти се Марија Кичевска Шокаровска, Христина Наќевска, Наташа Трендафилова Гицев, Франциско Хименез Руиз (Шпанија), Балаж Лочеи (Унгарија) заедно со хорот, оркестарот и балетскиот ансамбл на Националната опера и балет.
Публиката ќе може да ужива на средба со страста, љубовта и животните радости, како и вечниот сон за среќата, владетелка на светот.
Моќната и возбудлива кантата на Орф ја освои публиката уште на првата изведба во операта во Франкфурт во 1937 година, оттогаш со години го привлекува вниманието, како на режисерите и кореографите, така и на бројната публика која постојано ја бара на тековниот репертоар.
Во однос на репертоарот на Националната опера и балет на 15 октомври се одржа прес-конференција на која Оливер Арсовски, в.д. директор на НУ Национална опера и балет, Христо Саракинов, уметнички раководител на Опера, Кире Павлов, уметнички раководител на Балет, и Бурхан Дибрани, раководител на секторот маркетинг ги објавија новитетите што ќе бидат внесени во репертоарската политика на Националната опера и балет.
Ноември во Националната опера и балет ќе биде посветен на одбележување на 100 години од смртта на италијанскиот композитор Џакомо Пучини. За 8 ноември е најавена „Боеми“, на 16 ноември е „Мадам Батерфлај“, на 23 ноември е „Тоска“ и на 29 ноември е закажана „Турандот“. Претставите ќе бидат со странски диригенти и пејачи.
