Научниците во Иран пронајдоа темноцрвена смеса за која веруваат дека е кармин од бронзеното време, што укажува на тоа дека древните Иранци ги боеле усните уште од вториот милениум п.н.е.

Црвената боја за усни е пронајдена во мало украсено шише со хлорит, кое беше откриено во регионот Џирофт во југоисточен Иран во 2001 година. Неодамнешното датирање со радиојаглерод откри дека е направена некаде помеѓу 1936 и 1687 година п.н.е., што го прави веројатно „најстариот аналитички тестиран кармин“, пишува „ИФЛ“.

Колку и да звучи импресивна шминката стара речиси четири милениуми, истражувачите додаваат дека староста на овој кармин и не е толку изненадувачка „со оглед на долгогодишната, добро позната техничка и естетска традиција во козметологијата во антички Иран“.

Во древниот Блиски Исток и Египет досега се идентификувани пудри, сенки за очи и црни моливи. Сепак, темноцрвените пигменти како оние што се наоѓаат во кармините останаа непознати – сè до сега.

Хемиската анализа на остатоците оставени во шишенцето, кои наликуваат на фин пурпурен прав, покажа дека содржи претежно хематит, познат по својата интензивна црвена боја, затемнет од манганит и бранинит и дополнет со траги од галена, англизит и други органски супстанции. Во пронајдената козметичка смеса има и растителни влакна, веројатно поради нивните ароматични својства, кои можеби биле користени за мирис.

Истражувачите, исто така, идентификуваа кварцни честички, од мелен песок или кристали, за кои сугерираат дека можеби биле вклучени за да додадат малку сјај – иако многу помалку гламурозното објаснување е дека кварцот е од садот што се распаѓа.

„Со сјај или не, смесата исклучително потсетува на современи рецепти за кармин“, пишуваат авторите на студијата.

Поради ова и фактот на неговата необична содржина, истражувачите пишуваат дека „ја поддржува идејата дека козметичките производи во античко време биле брендирани, пакувани и тргувани во стандардни типови на садови со специфични форми кои овозможувале лесна визуелна идентификација“, како што е футрола со модерна козметика и парфеми.

Иако не е можно да се знае кој бил сопственик на карминот, откритието нуди увид во често занемарената козметичка индустрија од бронзеното доба.

Студијата беше објавена во списанието „Саентифик репортс“.