Научниците тврдат дека откриле еден од најраните примери на ревматоиден артритис на скелетот на жена од античка Нубија, стар околу 3.500 години. Скелетот бил ископан во 2018 година на гробишта покрај бреговите на Нил, во близина на Асуан, Египет, пишува „Лајв саенс“.

Анализите покажале дека жената била висока 150 сантиметри, имала меѓу 25 и 30 години и живеела помеѓу 1750 и 1550 година п.н.е.

Податоците од ова истражување се објавени во мартовското издание на „Интернешнал џрнал оф палеопати“ (International Journal of Paleopathy).

Истражувачите можеле да спроведат детална остеолошка анализа, бидејќи пронајдениот скелет бил добро сочуван и ги имал речиси сите коски, вклучувајќи ги и коските на рацете и стапалата.

„Во многу археолошки случаи нема целосен скелет. Овие останки ни дадоа шанса да погледнеме болест која активно ги напаѓа малите коски на рацете и стапалата“, изјавила Маделеин Мант, професор по антропологија на Универзитетот во Торонто.

Анализите откриле дека младата жена имала ревматоиден артритис, автоимуна болест каде што имунолошкиот систем ги напаѓа ткивата и тоа доведува до воспаление на зглобовите.

„Оваа личност имаше отечени зглобови, силна болка и отежнато движење. Прашање е како изгледал животот на некој со вакви проблеми во тоа време“, додала Мант.

Инаку, жената била пронајдена закопана со гробни предмети, вклучително и кожна облека со монистра направена од лушпи од јајца од ној и камен, алка од бисер и фрагменти од нубиска и египетска керамика.