Штипската Клиничка болница во моментов се снабдува со струја од агрегат, бидејќи околу 15 часот при изведување на градежните активности на новиот влез на болницата скинат е среднонапонски кабел, потврди вечерва за МИА директорот на болницата, д-р Владко Захариев. Тој рече дека пациентите кои се во критична состојба во болницата не се загрозени, бидејќи струја има за апаратите и салите.

„Информирани се сите болници и регионални центри во источниот регион, доколку имаат пациенти кои се критични да се прифаќаат во болницата во Кочани или да се транспортираат во Скопје. Пред половина час пристигна екипа на ЕВН и работи на санација на кабелот“, вели Захариев.

Според првичните информации, се очекува проблемот со струјата да се реши околу полноќ. Захариев додава дека нема потреба од паника или стравување, бидејќи болницата е приклучена на агрегат и се работи на решавање на проблемот.