Иако многумина велат дека на тесните фармерки им дојде крајот, и широките „торбести“ пантолони ќе станат симболот на генерацијата З, сепак деновиве тие привлекуваат огромно медиумско влијание.

Наводно, севернокорејскиот лидер Ким Џонг-Ун ги банираше тесните фармерки поради промовирање на „капиталистички начин на живот“.

Според написот на Прија Елан за „Guardian“, повикувајќи се на други извештаи, овој потег, исто така, наводно опфаќа и одредени видови на машки фризури, како и пирсеви.

Написот цитира и текст од јужнокорејската новинска агенција „Yonhap News Agency“ од почетокот на овој месец, но во овој текст не се споменуваат фармерки или други предмети. Наместо тоа, се наведува дека официјалниот весник на Северна Кореја повикал на „напори да се спречи влегувањето на капиталистичката култура во земјата“.

Во друг текст на „Guardian“ од 2009-та година пак, во кој се зборува за црните северно-корејски фармерки извезени во Шведска, се вели дека раководството на Северна Кореја, наводно, сметало дека тексасот во сина боја е „симбол на американскиот империјализам“ со години.

Во меѓувреме, во остатокот од светот, долгата пандемија ги натера дури и оние кои не сакаат мода да се фокусираат на помалку ограничувачките форми на облека.