Медицински сестри се принудени да прегледуваат пациенти поради недостиг од лекари кои би дежурале на Одделот за офталмологија во болницата во Куманово, пишува „Порталб“.

Пациентите се жалат дека на Очното одделение нема дежурни лекари кои би ги вршеле прегледите по 15 часот и дека имало случаи кога терапијата и прегледите ги вршеле медицинските сестри. Тие, пак, велат дека даваат се од себе пациентите да не ги остават без помошта за која им се обраќаат.

Од Министерството за здравство, без да понудат конкретен одговор, за „Порталб“ дека во оваа болница има четворица лекари специјалисти и еден специјализант.

Кумановецот Б.А. на 7 ноември околу 21 часот се обратил до одделот за офталмологија бидејќи имал крвавење во очите. Тврди дека при прегледот во болницата немало дежурен лекар.

„Минатата недела имав проблеми со очите, имав пукнат капилар на едното око и крвавев. Кога пристигнав на Одделението за офталмологија ме однесоа во собата за преглед, а при прегледот ја прашав сестрата која ме прегледуваше дали е доктор или медицинска сестра? Не ми одговори, јас повторно ја прашав таа пак не ми одговори, а по неколку минути ја прашав по трет пат и ми вели: Сакаш да те прегледаме или не?! Јас ѝ реков: Секако, да, но зошто не ми одговараш? Таа одговори дека е медицинска сестра и дека нема дежурен лекар. Јас ѝ реков дека не е квалификувана да дава рецепти и да ми поставува дијагноза во отсуство на лекарот, а таа ми рече дека се труди да си ја врши работата затоа што има искуство и имала такви случаи и може да ми помогне. Ми рече дека ако сакам да ме прегледа лекар, да сум дошол утредента. Капките што ти ги дадов ќе ти помогнат, и може да примате витамин Ц затоа што не е опасно, ми рече медицинската сестра“, вели револтираниот граѓанин.

Тој додаде дека „не е во ред да има недостиг од лекари на ова одделение, и како може и медицинска сестра од почеток да не каже дека не е лекар, тоа е недозволиво бидејќи очите се огледало на здравјето“.