Науката одговори на прашањето што ги мачи сите Македонци: Дали провевот е навистина опасен?
Меѓу Македонците постои врежано мислење дека провевот може да нѐ „убие“. Огромен процент луѓе се гушат во зачадени простории не дозволувајќи воздух да влезе преку прозорецот, доколку во исто време е отворена вратата. За секоја појава на вкочанетост, главоболка и разни воспаленија се склони да ја обвинат невидливата појава – провевот.
Препорачано
Многумина веруваат дека некои луѓе се почувствителни на провев од другите и сметаат дека поради прекумерна циркулација на воздухот може да настинат.
А, што вели науката за тоа?
Лекарите велат дека не се разболуваме поради провевот, туку поради вирусот. Но, тие додаваат дека изложеноста на провев влијае на нашиот организам, така што на нашата кожа и под неа се одвиваат процеси коишто може да резултираат со течење на носот или со вкочанет врат.
Провевот е поврзан со т.н. индекс на ладење, односно со субјективното чувство на ветровито време на кожата. Колку е поголема брзината на ветрот, толку е помало чувството на температура, односно толку побрзо е ладењето.
Како мокар костум во ладна вода
Но, ако сте здрави, нема да се разболите само затоа што сте биле изложени на провев.
Д-р Михаел Дег, член на германското здружение на оториноларинголози (BVHNO), спомнува уште една можна последица од провевот: вкочанетост на вратот, особено при топло време.
„Ако ви е жешко и седите пред вентилатор или многу блиску до клима-апаратот или отворате прозорец додека патувате со автомобил, воздухот што дува низ вашата топла и често испотена кожа може во некои случаи да резултира со напнатост во пределот на вратот“, вели Дег.
И тогаш, што да направите за да „не ве убие провевот“?
Пред сѐ, вклучете ги вентилаторите кога е многу топло времето само накратко и погрижете се да не ви се премногу блиску. За да избегнете ладење од испарувањето на водата на кожата по пливање, веднаш соблечете го влажниот костим за капење.
И иако би можело да ви годи кога целосно ќе ги отворите прозорците на автомобилот во кој се возите, додека сте испотени, подобро да не го правите тоа. А, ако користите клима-апарат, не дозволувајте вентилацијата да дува директно во вас.
Слободно проветрувајте ги просториите и во зима, кога надвор е многу студено. Ако сте здрави, експертите препорачуваат да ги отворите ширум прозорците неколку минути за да овозможите свежиот воздух да влезе во просторијата.
Ако притоа ви е ладно поради ветрот, накратко облечете уште еден слој топла облека или едноставно привремено излезете од собата.
