Двете „вонземски мумии“ кои мистериозно се појавија на аеродромот во перуанската престолнина Лима минатиот октомври се целосно од копнено потекло, покажува научна анализа објавена вчера.

На прес-конференцијата експертите ги опишаа двата мали примероци како кукли слични на луѓе, најверојатно направени од човечки и животински делови. Анализирана е и специјална рака со три прста за која се верува дека е од провинцијата Наска во Перу, а експертите отфрлиле каква било поврзаност со вонземски живот.

„Овие не се вонземјани. Тие се кукли направени од животински коски од оваа планета, поврзани една со друга со модерен синтетички лепак“, вели Флавио Естрада, археолог од перуанскиот институт за правна медицина и судска медицина.

„Тоа е целосно измислена приказна“, додаде Естрада.

Две фигурини, кои личат на мумифицирани тела, облечени во традиционална облека на Андите, се појавија на аеродромот во областа на компанијата за испорака ДХЛ во картонска кутија. Некои медиуми тогаш шпекулираа за нивното можно вонземско потекло.

Две други мали мумифицирани тела со издолжени глави и раце со три прста беа предмет на сослушување на мексиканскиот конгрес во септември минатата година. Мексиканскиот новинар и долгогодишен ентузијаст за НЛО, Хаиме Маусан, тврди дека илјадагодишните тела пронајдени во Перу во 2017 година не се поврзани со ниту еден познат вид.

ВИДЕО | Кукли претставени како „вонземјани“ пред мексиканските конгресмени

Повеќето експерти подоцна ги отфрлија како измами и рекоа дека веројатно биле осакатени антички човечки мумии измешани со животински делови, но тие дефинитивно биле од планетава.

Експертите на прес-конференцијата, организирана вчера од перуанското Министерство за култура, не кажаа дека куклите пронајдени во просториите на ДХЛ се поврзани со телата во Мексико, за кои исто така нагласија дека не се вонземски.