Научниците го дијагностицираа најмладиот пациент на светот со Алцхајмерова болест.

Невролозите од клиниката за меморија во Кина дијагностицирале Алцхајмерова болест кај 19-годишник, што го прави најмладата личност во светот на кој му е дијагностицирана оваа состојба.

Тинејџерот почнал да доживува опаѓање на меморијата околу 17-годишна возраст, а когнитивните губитоци само се влошувале со текот на годините.

Снимањето на мозокот на пациентот покажа собирање на хипокампусот, кој е вклучен во меморијата, а неговата цереброспинална течност наговестила вообичаени маркери на оваа најчеста форма на деменција.

Алцхајмеровата болест (АД) често се смета за болест на постарите лица, но, сепак, случаи со ран почеток, кои вклучуваат пациенти на возраст помлади од 65 години, чинат до 10 отсто од дијагнозите, пренесува „Саенс алерт“ (Science alert).

Речиси сите пациенти на возраст помлади од 30 години може да имаат Алцхајмерова болест која се објаснува со патолошки мутации на генот, што ги става во категоријата на наследна Алцхајмерова болест (ФАД). Колку е помлада личноста кога ќе добие дијагноза, толку е поголема веројатноста дека тоа е резултат на погрешен ген што го наследила.

Сепак, истражувачите од Медицинскиот универзитет Капитал во Пекинг не можеле да пронајдат ниту една од вообичаените мутации одговорни за раното губење на меморијата, ниту, пак, сомнителни гени кога извршиле пребарување ширум геномот.

Пред оваа дијагноза во Кина, најмладиот пациент со Алцхајмерова болест имаше 21 година. Тие носеле мутација во генот ПСЕН1, што предизвикува таложење на абнормални протеини во мозокот, формирајќи наслаги на токсичните плаки, што е вообичаено кај Алцхајмеровата болест.

Случаите како најновиот во Кина претставуваат мистерија. Никој во семејството на 19-годишникот немал историја на Алцхајмерова болест или деменција, што отежнувало да се категоризира како ФАД, но тинејџерот немал други болести, инфекции или траума на главата што би можеле да го објаснат неговиот ненадеен когнитивен пад.

Две години пред да биде упатен на клиниката, тинејџерот имал проблем да се фокусира на предавањата на училиште. Читањето, исто така, станало тешко и неговата краткорочна меморија опаѓала. Често не можел да се сети на настаните од претходниот ден и секогаш ги губел своите работи.

На крајот, когнитивниот пад станал толку голем што момчето не можело да заврши средно училиште, иако и понатаму можело да живее самостојно.

„Истражувањето на мистериите на младите луѓе со Алцхајмерова болест може да стане едно од најпредизвикувачките научни прашања во иднината“, предвидуваат невролозите.

Студијата е објавена во списанието „Журнал за Алцхајмерова болест“.