Саша Аврамовиќ (30), поранешен српски репрезентативец, доби доживотна забрана за играње кошарка од ФИБА. Тој има право на жалба на оваа одлука.

Порано во клупската кариера беше соиграч на моментно една од најголемите НБА ѕвезди, Никола Јокиќ, кога настапуваа за Мега Визура. Во периодот 2014-2015 овој плејмејкер ги бранеше и боите на македонскиот кошаркарски клуб Куманово.

Потоа, направи трансфер во словачкиот Кошице, во 2016 беше дел од Вршац, а од 2017 повторно е во Словачка овојпат во дресот на Искра Свит. Во 2018 година беше најдобар стрелец во словачката кошаркарска лига, како и прогласен за МВП во таа земја.

Светската кошаркарска куќа, ФИБА собра голем број докази против српскиот кошаркар, но не се знае што точно направил. Словачките медиуми објавуваат дека го уништил интегритетот на лигата, дека се обложувал и наместил натпревари.

– Жалиме што сомнежите се потврдија, но јасно е дека ФИБА го презема кошаркарскиот интегритет со најголема сериозност. Верувам дека оваа санкција ќе ги одврати сите можни наместени натпревари од нивните активности. На крајот, ќе биде подобро за лигата, бидејќи претходно беше кажано дека повеќе играчи учествуваат во слични активности, без разлика дали тоа е нивна иницијатива или иницијатива на организирани групи кои постојат и многу влијаат на игрите преку играчи, судии и слично – вели генералниот секретар на Кошаркарската федерација на Словачка, Андреј Куфа.

Аврамовиќ го освои златниот медал со младата репрезентација на Србија на младинските олимписки игри во Сингапур во 2010 година, како и бронза со селекцијата до 16 години на Европското првенство и сребро на ЕП за играчи до 18 години.