Наследниците на американската пејачка Дона Самер го обвинуваат Канје Вест (46) дека украл делови од нејзиниот хит „I Feel Love“ за неговиот нов албум. Во тужбата поднесена во Калифорнија, сопругот Брус Судано тврди дека Вест и Тај Дола Сајн, со вистинското име Тајрон Грифин, извршиле бесрамна кражба откако конкретно им било одбиено барањето да ја искористат песната на нивниот заеднички албум „Vultures 1“.

Во тужбата се наведува дека парот користел препознатливи делови од песната на Дона Самер во нивната нова песна „Good (Don’t Die)“ и покрај тоа што нивното барање било одбиено поради контроверзното минато на Вест, пишува „Ројтерс“.

Судските документи сугерираат дека барањето за користење на песната било поднесено на 31-ви јануари и последователно одбиено, но албумот сепак бил објавен една недела подоцна, на 10-ти февруари.

Потоа, претставниците на Вест и Грифин се обратиле до издавачката куќа на Дона Самер за да побараат одобрение за мастеринг на песната, што исто така било одбиено, според судските документи.

Песната беше „стримувана“ многу пати пред платформите како Spotify, iTunes и Apple Music да успеат да ја отстранат, при што Вест и Грифин ја изведуваа песната на снимени концерти и онлајн клипови собраа милиони прегледи.

Во тужбата се бара максимална отштета од околу 150.000 долари за секое прекршување.

– Станува збор за заштита на музичкото наследство на Дона Самер и една од највлијателните песни на поп музиката – се наведува во судските документи.

Самер, петкратна добитничка на Греми, почина во 2012 година на 63-годишна возраст, а една година по нејзината смрт постхумно беше примена во Куќата на славните на рокенролот.