Семејство кое викендов шетало по патека во Тексас дошло до изненадувачко откритие кога забележале напуштено новороденче завиткано во крпа. Бебето пронајдено во саботата вечерта било „тазе родено“ со остатоци од папочната врвца сè уште присутни, соопштија властите. Семејството веднаш повикало служби за итна помош.

Бебето било во стабилна состојба во болница во Кети, Тексас, соопшти канцеларијата на шерифот на округот Харис во саботата, пренесува Би-Би-Си.

„Непознат маж“ го оставил бебето на мал мост, соопшти канцеларијата на шерифот, но тие сè уште немаат осомничен.

Околу 9:00 часот по локално време, Даниела Федел се движела по патеката со сопругот, тригодишната ќерка и нивните кучиња кога забележала нешто.

„Забележав како се движат две стапала и му викнав на мојот сопруг: „О, боже, бебе, бебе!““, изјави Федел за локалната телевизија КХОУ.

Нејзиниот сопруг брзо се јавил на брза помош. Таа рече дека побрзале да го земат бебето и нашле сенка. Временските прогнози во областа покажуваат дека температурите тој ден достигнале максимум од 35,5 степени Целзиусови.

„Оваа слика ми се вртеше низ глава толку многу пати“, рече Федел. „Како можеш да го направиш тоа?“.

Канцеларијата на шерифот соопшти дека откако бебето било прегледано и третирано од лекари, агенцијата за заштита на децата во Тексас ќе стапи во акција. Лицето кое го напуштило бебето може да се соочи со обвинение за напуштање и загрозување на дете.