Сè е запишано во ѕвездите – велат оние кои внимателно ги проучуваат и се занимаваат со астрологија. Според нив, ѕвездите не одлучуваат само за нашиот живот, иднина и судбина. Ни кажуваат и како да се облекуваме, што да јадеме и пиеме. Ако ви се допаѓа коктелот предвиден за вашиот знак, тогаш – на здравје!

Овен

Со Овенот владее Марс, богот на војната, па во тој дух идеален коктел кој ќе одговара на неговата огнена природа е освежувачки, со малку алкохол, ќе има смирувачки ефект врз нетрпеливата, агресивна природа на овој хороскопски знак.

Насау коктел

Потребно е: чашка сок од лимон и чашка сок од грејпфрут, 4 чашки сок од портокал, две чашки вотка и сируп од малини.

Подготовка: измешајте ги сите состојки, додадете коцки мраз, истурете во изладена чаша и украсете со парче лимон, свежи рибизли и листови нане.

Бик

Со овој знак владее Венера, па Бикот е сензуален гурман кој ужива во друштво. Нивниот цвет е роза и го сакаат мирисот на нане. За Биковите нема подобар пијалак од оној кој го стимулира и задоволува нивниот префинет вкус.

Зелен коктел

Потребно е: чашка бел рум, чашка ликер од нане, 2 чашки вотка, листови свежо нане.

Подготовка: измешајте ги сите состојки, додадете искршен мраз, истурете во изладени чаши, декорирајте со роза и листови свежо нане.

Близнаци

Променливиот, непостојан Близнак, предводен од Меркур сака силни бои и двосмислени ситуации, но со одредени решенија. Ќе им се допадне коктелот што го препорачуваме, бидејќи го сакаат мирисот на анасон.

Анaсон коктел

Потребно е: чашка ликер од вишни, 3 чашки мастика, 3 чашки вода и мраз.

Подготовка: сите состојки ставете ги во шејкер, додадете многу мраз, добро протресете и ставете го во чаши. Послужете го украсен со прстени од портокал и некое егзотично или сезонско овошје.

Рак

Раковите по природа се носталгични сонувачи. Обожаваат сè што е имагинативно и неостварливо. Сакаат дискретни бои, но и храна со силен вкус. На овој знак, кој по природа е бавен, му треба одредено охрабрување, па ќе ужива во остар краток пијалак.

Пенлив шејк

Потребно е: чашка вотка, 3 чашки бел рум, 3 чашки сок од лимон, 2 лажички изматени белки, мраз.

Подготовка: сите состојки ставете ги во миксер и мешајте додека не се запенат. Послужете во изладена чаша.

Лав

Лавот-роден лидер, сака сè што го истакнува и ја зајакнува неговата силна и нескротлива природа. Како неговиот заштитник Сонцето, му прилега жолтата боја и мирисот на босилекот, кралското растение.

Коктел од ананас

Потребно е: чаша пенливо вино, чашка сируп од ананас, парчиња свеж ананас.

Подготовка: Сирупот од ананас прелијте го со ледено вино, додајте чаша прстени од ананас и листови босилек и послужете веднаш, додека е пенливо.

Девица

Срамежливата и воздржана Девица е секогаш дотерана и полна со обѕир. Има супериорна контрола над своите чувства и постапки. Сака дискретни бои, придушена светлина и придушени чувства. Ќе ужива во коктел кој малку ќе ја „протресе“.

Коктел за охрабрување

Потребно е: 2 чашки вотка, 1 чашка ликер од круша, чашка крем од какао, мраз, газирана вода.

Подготовка: добро измешајте ги сите состојки, додадете коцки мраз и малку газирана вода. Украсете со цветови од хортензија и гранчиња мајчина душичка.

Вага

Вагите се префинети, елегантни, шармантни и неодлучни. Тие сакаат сè што е префинето и убаво. Нивната боја е розова. Препорачуваме коктел со шумски јагоди, кои се нивните омилени овошки.

Коктел Розини

Потребни се: 2 чашки вотка, шолја шумски јагоди, чашка коњак, 2 чаши пенливо вино.

Подготовка: Измешајте ги сите, добро изладени состојки и истурете ги во високи чаши за шампањ. Украсете со прстени од портокал и јагоди.

Скорпија

Страсна и емотивна, секогаш растргната од внатрешни пожари, Скорпијата е знак познат по крајности. Нејзините планети, Марс и Плутон, ја прават агресивна, но и богата. Скорпиите сакаат силни бои, силни вкусови и силни искуства.

Милионер

Потребно е: 2 чашки бел рум, чашка темен вермут, чашка сок од лимон, мраз.

Подготовка: измешајте ги сите состојки во шејкер, истурете ги во длабоки чаши и декорирајте со гарденија.

Стрелец

Искрениот, весел оптимист Стрелец сака силни бои и зачинети вкусови. Нивната страст е патувањето. Затоа им предлагаме пијалак кој ќе им го донесе далечно море.

Брегот на Слоновата Коска

Потребно е: 2 чашки сок од лимон, 3 чашки сок од портокал, чашка ликер од вишни, чашка ликер од киви, чашка „bitters“.

Подготовка: измешајте ги сите состојки, додадете мраз, истурете во чаши и украсете со парчиња портокал и лимон.

Јарец

Строгите, решителни и конзервативни Јарци со кои владее Сатурн сакаат темни нијанси и остри вкусови. Им одговара цветот на азалеја. Нивниот коктел е темен, хранлив и гломазен.

Црно кадифе

Потребно е: чаша силно, густо црвено вино, жолчки од јајце, малку рендано морско оревче, сода вода.

Подготовка: Сите состојки изматете ги во миксер, истурете ги во длабока чаша, во силен млаз додајте газирана вода и веднаш послужете.

Водолија

Непредвидливи, непостојани и секогаш во облаци, Водолиите сакаат сè што е природно, освежувачко и стимулирачко. Тие живејат во вечна напнатост и ги привлекува сè што е недостижно. Ќе си замислат дека е на крајот на светот со:

Коктел фантазија

Потребно е: 3 чашки сок од лимон, 2 чашки ликер од нане, 2 чашки вотка, тоник.

Подготовка: измешајте ги сите состојки, додадете кришки сезонско овошје и послужете разладено.

Риби

Недофатливите, нејасни и романтични Риби со кои владее Нептун, богот на морето, во големата вода гледаат слобода и бегство од секојдневната монотонија.

Океан

Потребно е: 2 чашки вотка, 1 чашка ликер од киви, парче ананас, мраз.

Подготовка: измешајте ги сите состојки, украсете со кругче од ананас и послужете разладено.