Има нешто многу романтично во патувањето со воз. Опуштено возење, пејзажи што се менуваат пред очите, чувство на враќање во минатото, кон себе и кон природата… Сето ова ја прави железницата една од омилените опции за патување за оние кои сакаат да уживаат во секој момент од патувањето. А ако на тоа додадеме допир на луксуз, резултатот е незаборавно искуство, пишува „Путни кофер“.

Токму такво искуство се подготвува во Франција. Имено, новата луксузна тура со воз наречена „Ле гранд тур“ ќе го започне своето прво патување во септември 2025 година. Станува збор за петдневна и шестдневна авантура што ќе ги однесе патниците низ некои од најубавите и најпознатите места во Франција, во ретро стил Бел Епок.

Враќање во златното доба на патувањето со воз

Патувањето започнува во Париз, поаѓајќи од историската железничка станица Гар де л’Ест, една од најстарите и најпрометните во градот, позната по својата импресивна архитектура од 19. век и како важна појдовна точка за бројни домашни и меѓународни линии. Првата станица на ова луксузно патување е Ремс, центарот на регионот Шампањ, познат по својата величествена готска катедрала и, секако, познатите француски пенливи вина.

Следната дестинација е Бон, живописен град сместен во срцето на винскиот регион Бургундија, каде што патниците ќе имаат привилегија да учествуваат во приватна тура низ историската болница „Hospices de Beaune“ основана во 15 век, која сега е едно од најпрепознатливите архитектонски и културни богатства на Франција. После тоа, возот патува на југ, до сончевата Прованса и Авињон, каде што можете да уживате во дегустација на локални деликатеси, а потоа продолжува до средновековната тврдина Каркасон и шармантниот Монтобан.

Разгледајте ги цените на кабините

Следната станица е крајбрежјето, имено заливот Аркашон и возење со традиционален дрвен чамец од пинас по 76 километри песочни плажи. Турата завршува во Ла Рошел, а последната станица е тематскиот парк Пуи ди Фу во западна Франција, кој е и коорганизатор на целиот проект.

Возот со кој патувате е вистинско уживање за љубителите на дизајнот и историјата. Станува збор за луксузно декориран воз инспириран од периодот од крајот на 19. и почетокот на 20. век. Со капацитет до 42 патници, осум кабини кои се претвораат во приватни салони во текот на денот и ресторан управуван од готвач со три ѕвездички на Мишелин, Ле Гранд Тур нуди уникатно искуство.

Сепак, сето ова има цена. Според достапните информации, цената на кабина за две лица започнува од 8.450 евра, додека луксузна кабина ќе ве чини околу 15.600 евра.