Израелските сили убиле најмалку 33 Палестинци во Појасот Газа, вклучително и еден спасувач, соопштија здравствените власти, додека војниците го продлабочиле упадот долж северната граница на територијата, бомбардирајќи болница и рушејќи куќи, објави Ал Џезира.

Најмалку 12 лица загинаа во израелски напад врз куќа во областа Џабалија во северна Газа, додека најмалку десет лица се водат како исчезнати, а спасувачките операции продолжуваат. Лекарите, исто така, известија дека еден маж е убиен во гранатирање со тенкови во близина.

Во друг израелски воздушен напад загинаа седум Палестинци, вклучително и една девојка, во Маваси, хуманитарна област западно од Кан Јунис во јужниот дел на Појасот Газа.

Во одделен воздушен напад врз куќа во населбата Ал-Ремал во Газа загинаа четири лица, додека тројца Палестинци беа убиени, а најмалку 20 други беа ранети во напад на училиште во кое се сместени раселените семејства во центарот на Газа.

Во предградието Сабра во градот Газа, палестинските служби за итни случаи соопштија дека израелски воздушен напад бил насочен кон еден од нивните тимови за време на спасувачката операција, при што загинал еден член на персоналот, а се ранети уште тројца. Во блиската населба Зејтун, во израелски напад врз куќа загинаа две лица, соопштија медицинските лица.

Во Рафа, на југ, медицинските лица известија дека тројца мажи биле убиени, а неколку други се ранети во два одделни израелски воздушни напади.