Скопјани во изминатиов период се под наезда на мушички, кои се забележани речиси низ сите населби во градот. Роевите од инсекти најмногу можат да се забележат во парковите, зелените површини низ Скопје, како и во населбите што се наоѓаат во должина на течението на реката Вардар. Карактеристично е и тоа што овие инсекти најмногу можат да се забележат во попладневните и вечерните часови, токму во периодите кога граѓаните на главниот град се опуштаат во долги прошетки или седат во парк, но и во двор по напорниот работен ден.

– И другпат имало мушички и комарци во овој период од годината, но наездата на инсекти на која сме сведоци во изминатите неколку денови, буквално не паметам дека се случувала и досега. Во маркетите забележувам дека луѓето постојано купуваат средства или спрејови за заштита од овие ситни инсекти – раскажува жителка на Општина Ѓорче Петров, која меѓу другото вели и дека седењето во двор во изминатиот период е невозможно бидејќи мушичките не им даваат можност за одмор.

Иако овие мали инсекти не касаат, сепак создаваат немир кај граѓаните бидејќи им влегуваат во носот, устата и во очите, потоа се лепат по облеката а влегуваат и во храната и во пијалаците.

И од Град Скопје велат дека се запознаени со овој проблем што во последниот период ги мачи скопјани и ветуваат дека ги преземат сите можни мерки и активности потребни за брзо и навремено решавање на овој проблем.

– Службите од Градот Скопје се запознаени со овој проблем и навремено е соодветно реагирано за негово решавање. Станува збор за сезонски мушички, кои најчесто се појавуваат секоја година во рамките на временскиот период мај-јуни. Град Скопје е надлежен за дезинсекција, односно за прскање против ларви од комарци и возрасни форми на комарци. Дезинфекцијата и дератизацијата ја спроведуваат органите на Министерство за здравство, односно Центарот за јавно здравје – објаснуваат од Одделението за односи со јавност на Град Скопје.

Оттаму велат дека тие како градска власт, се обратиле со допис до Центарот за јавно здравје.

– Службите од Градот Скопје се обратија со допис до Центарот за јавно здравје, по кој е договорено да се спроведат третмани со вонредно прскање, оросување и замаглување по кејот на Вардар и низ градските паркови против мушички. Прскањето беше предвидено да се реализира овој период, но поради лошите временски услови не беше спроведено. Тоа ќе се реализира во наредниот период кога ќе дозволат временските услови – информираат од Градот.

Според експертите, станува збор за појава на зголемена концентрација на ситни мушички, која е предизвикана од влагата и високите температури. Мушичките не касаат, но на граѓаните им предизвикуваат проблеми бидејќи им влегуваат во очи, нос и уста.