По минатонеделното излевање на вода на улицата „Никола Парапунов“ во Општина Карпош, од ЈП „Водовод и канализација“ информираат дека најавениот прекин на вода во Скопје ќе биде по 22:00 часот во петок (20 декември) и ќе трае се до санирање на дефектот.

Вода во Скопје ќе ИМААТ жителите на Чаир, Бутел, Радишани, Пластичарска до Американска амбасада, Визбегово, Бардовци, Железара, Автокоманда висока зона, Ѓорче Петров од СП Планет, Сарај, Шутка, Топанско поле, Новоселски пат, Кисела Јабука, Стопански двор, Волково и Орман. Останатите корисиници од Скопје ќе бидат без вода, велат од ЈП „Водовод“.

Тоа значи дека од кружниот тек во Ѓорче Петров, сите населби кои се наоѓаат на десната страна од реката Вардар, сè до Зелениково, ќе бидат без вода додека не се санира дефектот.

За таа цел ќе биде запрена водата од главниот градски цевковод Ф-1600, што е предуслов за да се спроведе претходно најавениот сложен оперативен план за санација на главниот цевковод. Покрај оваа локација, од „Водовод и канализација“ информираат дека ќе бидат санирани уште три дефекти на затварачи по должината на главниот цевковод, и тоа на потегот од кружниот тек во Ѓорче Петров до крстосницата на булевар „Партизански одреди“ со улица „Никола Парапунов“.

– Затворањето ќе биде извршено на затворач Ф-1600, кој локациски се наоѓа во кругот на касарната во Ѓорче Петров, со што во моментот на отпочнување со санација неопходно е затварање на вода на главниот градски цевковод Ф-1600 милиметри. Затворање на вода на главниот градски вод Ф-1600 милиметри се прави еднаш на педесет години, а последно такво затворање било 1991/1992 година за реализација на водоводен приклучок на бунарското подрачје Лепенец, велат од „Водовод и канализација“.

За решавање на дефект од овој тип се изготви оперативен план со кој поефикасно и побрзо ќе се санира. Со овој зафат покрај тоа што се врши санација на дефектите на претходно споменатите затворачи, директно ќе се намали загубата на вода од нивно протекување и ќе овозможи ревитализација на потегот од Ѓорче Петров до Карпош, се вели во соопштението.

Прекин во водоснабдувањето ќе има и во Автокоманда (ниската зона), како дел од планираните активности.

Од „Водовод“ најавуваат дека работите ќе се изведуваат со максимална брзина за што побрзо нормализирање на водоснабдувањето.

Додека Гази Баба, Општина Чаир, Бутел, Радишани, Пластичарската улица до американската Амбасада, Визбегово, Бардовци, Автокоманда (високата зона), Ѓорче Петров од „СП Планет“ до Сарај, Сарај, Маџари и Сингелиќ ќе имаат вода.

Од ЈП „Водовод и канализација“ информираа дека санацијата е потребна поради излевање на вода на улицата „Никола Парапунов“ во Карпош 4. Во сабота, 21 декември, ќе биде затворен главниот градски цевковод кај касарната во Ѓорче Петров за да се поправат неколку сериозни дефекти.

Од „Водовод“ не прецизираа кои населби ќе останат без вода и колку време ќе трае прекинот, но нагласија дека ќе се работи според утврден оперативен план. Иако од претпријатието посочија дека постепеното затворање на водата ќе започне во 22:00 во петок или на полноќ спрема сабота, а целосното ќе биде во утринските часови в сабота, не соопштија колку точно би траела интервенцијата.