Меѓународниот ден на џезот – 30 април од страна на УНЕСКО е прогласен во 2011 година. Идејата потекнува од џез-пијанистот Херби Хенкок, кој е амбасадор на добра волја на УНЕСКО.

Овој ден се одбележува со концерти, работилници, едукативни програми и јавни настапи во повеќе од 190 земји ширум светот, обединувајќи ги заедниците, училиштата, уметниците и ентузијастите. Џезот ја слави културната разновидност, промовира мир и меѓукултурен дијалог, поттикнува родова еднаквост и ја истакнува слободата на изразување.

Централната прослава на Денот на џезот годинава се случува во Абу Даби, Обединети Арапски Емирати. Настанот ќе биде предводен од легендарниот пијанист Херби Хенкок и воден од Оскаровецот Џереми Ајронс, а ќе настапат низа најреномирани џез-артисти од светот, меѓу кои Курт Елинг, Диди Бриџватер, Маркус Милер, Артуро Сандовал, Данило Перез и други.

Кај нас централниот настан по повод Меѓународниот ден на џезот ќе се одвива на две локации: Парк „Ибни Пајко“ и Македонски народен театар – Скопје, во организација на Националниот џез-оркестар.

Програмата во Македонскиот народен театар ќе почне во 18 часот со концерт на Брајан Марсела Трио (САД). Марсела e пијанист, композитор, бендлидер и едукатор од Њу Џерси. Роден е во Филаделфија и активен на сцената во Њујорк од 1998 година. Тој има издадено повеќе од 30 албуми како лидер и „сајд-мен“.

Концертот на американскиот пијанист Брајан Марсела и неговото трио е настан со кој нашата земја го одбележува 30-годишниот јубилеј од воспоставувањето дипломатски односи меѓу Република Северна Македонија и САД.

Програмата во Парк „Ибни Пајко“ ќе почне во 16 часот со Џез за деца и ќе продолжи во 19.30 часот со концерти на Бојан Цветковиќ Квартет (Србија), „Јо-Јо Бенд“ (Бугарија), Христијан Ристески Квартет (Словенија / Македонија / САД), а ќе заврши со Трио Драгоберт заедно со Милагрос Пињера (Куба / Австрија).

Во случај на неповолни временски услови, сите концерти ќе бидат префрлени во салата на Македонскиот народен театар.