На полноќ завршува јавниот увид во Избирачкиот список за Локалните избори 2025. Граѓаните до денеска имаат можност да ги проверат своите податоци во подрачните одделенија и канцеларии на Државната изборна комисија (ДИК), на веб-страницата sec.mk или преку електронска пошта.

Заклучно со 9 септември, увид извршиле вкупно 5729 граѓани, од кои 3397 мажи и 2332 жени. Осум лица поднеле барање за запишување во Избирачкиот список, 136 за бришење, а 59 за промена на податоците, најчесто поради промена на адреса или презиме.

Следниот рок е 13 септември на полноќ, до кога општинските изборни комисии треба да ги примат кандидатските листи за градоначалници и советници. ДИК најдоцна до 26 септември ќе го заклучи Избирачкиот список, а на 3 октомври ќе ги потпише конечните изводи на кои ќе се гласа.

Изборната кампања за Локалните избори започнува на 29 септември, а гласањето ќе се одржи на 19 октомври, на 3480 избирачки места низ 80 општини и Градот Скопје.