Активисти на подмладокот на Левица, кои себеси се нарекуваат „Црвена младина“, го вратија во „првобитната состојба“ графитот „Бугари во Устав е предавство“ испишан на кејот на Вардар во Скопје.

Откако неодамна графитот беше изменет да гласи „Бугари во Устав“ и со нацртано бугарско знаме, а потоа и целосно избришан, тој сега повторно е стариот.

Од Левица велат дека „ако треба уште стопати ќе дојдат“ за овој графит да стои во својата оригинална форма. Активистите на партијата објавија и видео во кое се жалат дека „полицијата на Панче Тошковски“ ги „малтретирала и прекинувала“ кога претходно сакале да го обноват графитот.

Пишувањето графити на јавни објекти, без оглед на содржината на напишаното, е прекршок на одредба од Законот за јавна чистота, кој се казнува со глоба од 50 евра.