На кејот на Вардар под Градската куќа во изградба стариот графит од април годинава на кој пишуваше „Бугари во Устав е предавство“ е коригиран односно остана „Бугари во Устав“, а „предавството“ е обоено со боите на бугарското знаме.

„Областа е преполна со безбедносни камери и полициско присуство, но пред неколку месеци никој не ги забележа сторителите, на кои очигледно им требаше многу време за да го насликаат овој голем знак“, пишува бугарската агенција БГНЕС.

За промената на графитот досега нема пријава во МВР, потврдија за „Слободен печат“ од Министерството.

Инаку, пораката „Бугари во Устав“ е онаа што претседателката Урсула фон дер Лајен пред десетина дена ја испрати од Скопје како единствен услов за државава да ги продолжи пристапните преговори за членство во ЕУ.

Владата на чело со Мицкоски е убедена дека доколку во Бугарија по изборите се формира регуларен владин кабинет на чело со победникот ГЕРБ-СДС на Бојко Борисов ќе може да се преговара за уставни измени со одложено дејство откако Бугарија ќе го откочи евроинтегративниот процес на Македонија.