Овогодишната претставничка на Србија на Евровизија, Констракта одлучи да ја покаже својата хуманост на дело и им се приклучи на групата познати личности кои ја користат својата популарност со цел да им помогнат на другите.

Констракта, имено, се согласила да оди на кафе со тој кој што ќе даде најголема сума на пари, а тие пари ќе бидат донирани за лекување на едно седум-месечно бебе кое боледува од спинална мускулна атрофија.

Пред два дена на Фејсбук страница која се занимава со лицитации со цел да им се помогне на најзагрозените, се појавила понудата за кафе со Констракта.

Српската пејачка Констракта за овој потфат ја контактирала девојка, која подоцна ја објавила понудата на Фејсбук. Девојката била пријатно изненадена што пејачката се согласила на ваквата понуда „без размислување“.

„Ова прекрасно суштество се согласи со моето барање да излезе на кафе со некој што ќе понуди највисока цена. Па драги луѓе, ако сакате да бидете во тренд и да пеете со Констракта, тогаш знаете што треба да направите. Нашите деца мора да бидат здрави“, напишала девојката во објавата.

Спиналната мускулна атрофија е тешка, наследна, прогресивна невромускулна болест која најчесто се дијагностицира кај децата. Болеста се карактеризира со дегенерација на долните моторни неврони и е најчеста наследна причина за смрт во првите години од животот. Ги лишува пациентите од способноста да одат, да јадат или да дишат.

Најголемата сума која моментално се нуди за кафе со Констрактa е 50.000 српски динари, што е околу 450 евра, но организаторите велат дека оваа понуда сигурно се уште ќе расте.