На 18 октомври се одбележува Светскиот ден на менопаузата, чија цел е да се подигне свеста за оваа фаза од животот и да се промовира одржување на женското здравје и благосостојбата.

На Универзитетската клиника за гинекологија и акушерство во Скопје по овој повод ќе се организира недела на бесплатни прегледи и консултации на пациентки во менопауза, во периодот од 17 до 21 октомври, од 14 до 20 часот.

– понеделник (17.10) – ас . д-р Даниел Милковски
– вторник (18.10) – доц . д-р Анета Сима
– среда (19.10) – ас . д-р Димитар Калчовски
– четврток (20.10) – ас . д-р Наташа Илиева
– петок (21.10) – ас . д-р Ева Созовска Белчовска

Целта на оваа активност е да се подигне свеста кај пациентките, да им се објасни сè она што би сакале да го дознаат во врска со оваа состојба, да добијат совет и да се насочат кон дополнителни иследувања, терапија и слично.

Секоја година во светски рамки се одбележува овој ден на различен начин – со предавања, трибини, советувања, превентивни прегледи и со дружби.
Темите се различни и се обработуваат по еден органски систем кај жените – годинава фокусот е ставен на грижата за менталното здравје (темата е расположение, когнитивна состојба кај жените во менопауза).

Менопаузата обично се јавува во раните 50-ти години на жената, но може да се случи порано или подоцна. Иако симптомите може да траат неколку години, се вели дека менопаузата настанала кога жената немала менструација 12 месеци.

Секоја жена е различна и ќе реагира на менопаузата на свој начин – и физички и емоционално – на промените што ги носи менопаузата.

Пред целосниот почеток на менопаузата постои фаза позната како перименопауза. Ова може да трае 4 до 5 години или подолго.

Не сите жени имаат симптоми во оваа фаза, но може да почувствуваат некои од следниве:

– Промени во менструалниот циклус
– Топли бранови и ноќно потење
– Главоболки или вртоглавица
– Сувост на вагината
– Тешкотии со спиење
– Промени во расположението
– Проблеми со меморијата
– Губење интерес за секс
– Зголемување на телесната тежина