1908 – Роден е австрискиот диригент Херберт фон Карајан, еден од најпознатите диригенти на 20 век кој со децении доминираше на светската музичка сцена, изведувајќи го со жестока емотивност, изразена фантазија и прецизност големиот оперски и концертен репертоар. Врвно ниво достигнал диригирајќи со Берлинската филхармонија и со оркестарот на Виенската државна опера.

1908 – Родена е американската филмска актерка Рут Елизабет Дејвис, позната како Бет Дејвис, двократна оскаровка. Снимила повеќе од 80 филмови и остварила низа големи драмски улоги, главно играјќи несреќни и лоши жени. Настапила во филмовите „Опасна“, „Џезабел“, „Елизабета и Есекс“, „Хуарез“, „Сѐ за Ева“, „Свадбен ручек“ и други. Дејвис е првата глумица со десет номинации за Oскар, а и првата жена која ја добила Наградата за животно достигнување од Американскиот филмски институт. Прогласена е за втора најголема ѕвезда во филмската историја.

2012 – Во Салцбург, на 76-години, умрел Фердинанд Александар Порше, внук на основачот на „Порше“ и дизајнер кој го осмисли класичниот спортски модел „911“. Фердинанд Александар Порше бил на чело на студио за дизајн „Порше“ во почетокот на 1960-тите, кога компанијата го развила популарниот модел „911“ кој и е нејзин симбол. Фердинанд Александар Порше во семејниот бизнис се вклучил уште како дете, поминувајќи го времето во работилницата на дедо му и во студиото за дизајн.