Кошаркарите на МЗТ Скопје Аеродром со победа над грчката екипа Арис со 70:66 (11-14, 18-15, 20-16, 21-21) среде Солун го почнаа циклусот подготвителни средби во пресрет на новата сезона.

Македонските шампиони одиграа одличен натпревар во кој настапија без Адем Мекиќ, Еван Максвел, Самит Јигитоглу и Андреј Андоноски поради повреди, како и без Бре Ајви, кој поради семејни проблеми доби дозвола подоцна да ѝ се приклучи на екипата.

Шутот од далечина беше речиси перфектен, за што потврда доаѓа од постигнатите 12 тројки, во што предничеа Дамјан Стојановски и Страхиња Миќовиќ со по три.

Домаќинот почна силно и брзо поведе 9:2, но играчите на МЗТ вратија со серија 17:7 за прво водство (19:16). Аеродромци потоа зголемија на „плус седум“ (40:33), за во последниот период да дојдат до највисоките 61:48. Арис не се предаде и врати со серија 15:2 (63:63), но „сино-белите“ возвратија искусно и ги реализираа следните два напади, и со тројката на Војдан Стојановски ставија крај на прашањето околу победникот.

Токму Стојановски со 16 поени беше најпрецизен кај МЗТ Скопје, а двоцифрен ефект имаа и Мицовиќ со 15 и Д. Стојановски со 11 поени. Дамјан Робев заврши со девет поени, Андреј Магдевски реализира седум, Мајк Кафи и Бојан Крстевски по пет, а во листата стрелци се впиша и новото засилување Димитар Пандев со два поени.