По победата во полуфиналето над Борац Бања Лука, македонскиот шампион успеа да слави и во финалето за прво место на меѓународниот турнир „Земун куп“ во Белград, Србија.

МЗТ Скопје Аеродром во битката за трофејот успеа да го совлада Младост Земун со конечен резултат 86:80.

Лидер на теренот беше Мајк Кафи, кој средбата ја заврши како најефикасен со 19 поени, а зад него беа Страхиња Миќовиќ со 12 и Дамјан Стојановски односно Еван Максвел со по 11 поени.

Тоа беше четврти триумф во низа за составот предводен од Александар Петровиќ во подготвителниот период.

Како што најавија од клубот договорени се и контролни мечеви во Самоков против бугарските екипи на Рилски спортист и Левски.