Во големата сала на Филхармонија на 18 март, со почеток во 20 часот, концерт ќе одржи Јордан Костов со музички пријатели од повеќе континенти. На концертот ќе биде промовиран албумот „Маглота“, снимен во Ханој, Виетнам, а сега ќе има премиерна изведба во Македонија.

Заедно со Јордан Костов на хармоника, на концертот ќе учествуваат Роман Столјар на пијано од Русија, Бренда Охана на маримба од Бразил, Фенг Хао на тапани од Шангај, Рубем Фариас на контрабас од Бразил, Ник Де Карло на туба од САД и хорот „Св. Злата Мегленска“ под водство на диригентот Летка Димовска – Полизова.

Јордан Костов (роден 1978 година во Кавадарци, Македонија) е сестран македонски музичар, хармоникаш, композитор, импровизатор, аранжер, продуцент и пијанист. Станува збор за уметник кој расчистил со предрасудите и го надминал стравот од конвенционалната креативна комуникација со глобалниот свет, создавајќи своја уникатна музика и изрази кои упорно се борат со формите на комерцијалната музика.

Претежно слободна во неговите музички форми, авангардната музика на овој сестран композитор и хармоникаш се движи во рамките на џезот и на светската музика, истовремено негувајќи го влијанието на класичните средновековни мајстори и задржувајќи ја врската со македонската музика, вклучувајќи ги нејзините егзотични скали и ритми.

Музиката на Јордан може да се окарактеризира како надреална, чудна и мрачна, додека неговата современа композиторска работа често вклучува специјални инструменти, отворени импровизации, дури и електронски звуци кои помагаат да се истражат нови и непознати димензии на создавање и интерпретација. Музичките концепции одат од соло изведби, мали џез-групи и биг-бендови до различни неконвенционални ансамбли и музички комбинации.