Првото издание на интердисциплинарниот и мултимедијален фестивал „Културен амалгам“ беше отворено на 23 јули во Културно-информативниот центар – Скопје, со што започна патувачкиот дел низ сродните установи низ Македонија и тоа: Домот на културата „Лазар Софијанов“, Кратово; „Спомен-куќа „Тодор Проески“, Крушево; и Културно-информативниот центар – Битола.

На затворачкиот настан, што ќе се одржи на 9 октомври, од 18 часот, во КИЦ-Скопје, публиката ќе има можност да се сретне со уметниците кои учествуваа на фестивалот, режисерот на филмовите „Митот за Сара“, „Мангава диско панк“ и „Долу од рајот“, Саша Станишиќ, и авторот на фотоизложбата „24“, Никола Јовановиќ.

Присутните ќе имаат прилика да разговараат со авторите и да им постават прашања во врска со нивната работа. На настанот ќе биде направен осврт на искуствата од мини уметничката турнеја и за плановите за следното издание на фестивалот.

Во својата основа фестивалот „Културен амалгам“ имаше за задача да отвори врати кон вистинска и коренита децентрализација на културата во Македонија преку поставување темели на соработка и градење на културна свест во различни средини низ различни градови.

Соработката на Културно-информативниот центар – Скопје со останатите центри, преку меѓуинституционалниот и мултимедијален фестивал постави темел за понатамошно аплицирање на истиот и низ останатите градови низ Македонија. Фестивалот е поддржан од Министерството за култура и туризам.