Научниците од истражувачката агенција „Ариа“, финансирана од британската влада со 800 милиони фунти, ќе го истражуваат потенцијалот на матиците во пчелните колонии за можно откривање на терапии кои би можеле да го продолжат животниот век на човекот, објавија британските медиуми.

Матиците кои имаат идентична ДНК како и пчелите работнички, но живеат многу подолго, долго време го привлекуваат вниманието на научниците кои се прашуваат дали токму тие можеби ја чуваат тајната на долговечноста и плодноста, пишува „Гардијан“.

Целта на амбициозниот научен проект е да се истражи биологијата на пчелите за да се утврди што им помага да преживеат со години и да бидат плодни, додека пчелите работнички живеат во најдобар случај само неколку месеци.

Агенцијата „Ариа“ се занимава со проекти со висока вредност, но и ризични кои може да пропаднат, но доколку успеат, би можеле да го променат општеството на подобро, наведува британскиот весник.

– Токму овие малку луди идеи имаат потенцијал вистински да го трансформираат сечиј живот – рече еден од 8-те програмски директори на агенцијата, Јаник Вурм.

Овој поранешен професор по еволутивна геномика и биоинформатика на Универзитетот Квин Мери во Лондон ќе води проект за проучување на пчели, оси, мравки и термити кои би можеле да дадат резултати корисни за здравјето на луѓето.

– Доколку можеме да откриеме и да ги искористиме начините на кои природата ги решава предизвиците со кои се соочуваат матиците, тоа би можело да донесе трансформација во запирање на процесот на стареење и подобрување на плодноста кај луѓето, како и нови решенија во борбата против болестите – рече тој.

Претходните истражувања покажаа дека младите матици ја складираат спермата на бројни мажјаци во посебен орган, а потоа ја ослободуваат во текот на нивниот живот за да ги оплодат нивните јајцеклетки. Во кошницата, пчелите работнички ја хранат матицата со посебен секрет богат со витамини, за кој се верува дека придонесува за подолг живот на пчелите, како и специфични антиоксиданти и микроби.

Како што потсетува „Гардијан“, минатата година научниците успеале да го продолжат животниот век на пчелите работнички со пресадување на микроби од матиците.

Агенцијата „Ариа“ е основана врз основа на идејата на поранешниот главен советник на поранешниот британски премиер Борис Џонсон, Доминик Камингс и е инспирирана од американската агенција за напредни истражувачки проекти во одбраната, Дарпа, потсетува весникот.

„Ариа“ претходно работеше, меѓу другото, на проекти поврзани со безбедноста на вештачката интелигенција, роботите, синтетичките растенија, како и други малку истражени области. Секој проект на „Ариа“ трае три до пет години, но на многумина им е потребно подолго време за да дадат резултати.

– Често за нашите програми велиме дека праќаат сигнал дека нешто е можно. Тоа не значи дека секогаш ќе успееме и ќе ја постигнеме посакуваната визија за иднината на крајот на одредена програма – рече претставникот на агенцијата Арија, Пипи Џејмс.