Мото ГП: Бањаја во неверојатен фото-финиш дојде до победа и испиша историја
Возачот на Дукати, Франчеко Бањаја триумфира на трката за Големата награда на Сан Марино и Римини во Мото ГП шампионатот откако во неверојатен фото-финиш го победи Енеа Бастијанини од Гресини.
Препорачано
Бањаја со триумфот на патеката „Марко Симончели“ ја запиша четвртата победа по ред и стана првиот возач на Дукати со вакво остварување. До денешната трка, Бањаја беше израмнет со Кејси Стонер, единствениот возач кој со Дукати стана шампион.
Бањаја славеше на трката со само 34 илјадити делови од секунди пред идниот клупски колега, Енеа Бастијанини. Последното место на победничкиот подиум му припадна на Маверик Вињалес од Априлија кој задоцни 4 секунди зад Бањаја.
Бањаја за прв пат изби на лидерската позиција во третиот круг, а веднаш зад него беше Вињалес. На осум круга до крајот, Бастијанини го помина Вињалес и тргна по првата позиција на Бањаја. Бастијанини единствениот напад го изведе на последниот свиок, но остана покус за само 34 илјадити делови од секундата.
Четвртото место му припадна на Лука Марини, а по него до десеттото место се пласираа Фабио Квартараро, Алеш Еспаргаро, Алекс Ринс, Бред Биндер, Хорхе Мартин и Алекс Маркес.
