Новата студија од Турку ПЕТ центарот во Финска покажува дека музиката предизвикува слични емоции и телесни сензации ширум светот.

Музиката може да се почувствува директно во телото. Кога ќе ја слушнеме омилената песна, нè обзема желба да се движиме во ритамот на музиката. Музиката може да го активира и нашиот автономен нервен систем, па дури и да предизвика морници, пишува „Псај.орг“.

„Музиката која буди различни емоции, како среќа, тага или страв, всушност предизвика различни телесни сензации во нашето истражување. На пример, веселата музика погодна за танцување предизвикуваше сензации во рацете и нозете, додека нежна и тажна музика предизвикуваше сензации во пределот на градите“, вели истражувачот Веса Путкинен.

Емоциите и телесните сензации предизвикани од музиката беа слични кај слушателите ширум Запад и Азија. Телесните сензации беа поврзани и со емоциите што ги предизвикува музиката.

„Одредени акустични својства на музиката се поврзани со слични емоции кај слушателите и во западните и во азиските земји. Музиката со јасен ритам се смета за среќна и погодна за танцување, додека дисонанцата е поврзана со агресија. Бидејќи овие чувства се слични кај различни култури, емоциите предизвикани од музиката се веројатно независни од културата и образованието и се засноваат на вродени биолошки механизми“, вели професорот Лаури Нуменма.

Ефектот на музиката врз телото е универзален. Луѓето се движат во ритамот на музиката во сите култури и синхронизираните ставови, движења и вокализации се универзален знак на поврзаност.

Музиката можеби потекнува за време на еволуцијата на човечкиот вид за да ја подобри социјалната интеракција и чувството за заедница преку синхронизирање на телата и емоциите на слушателите.

Инаку, студијата беше спроведена во соработка со Универзитетот „Алто“ во Финска и Универзитетот за електроника и технологија во Кина како онлајн анкета. Вкупно 1.500 учесници од западните и азиските земји ги опишаа емоциите и телесните сензации предизвикани од западните и азиските песни.