Научниците веруваат дека допирот може да помогне во ублажувањето на менталните и физичките заболувања, пишува „Гардијан“.

Коавторката на новото истражување Хелена Хартман од Универзитетската болница Есен вели дека покоординираниот допир во текот на денот може да помогне во ублажување или потенцијално ублажување на менталните и физичките заболувања.

Истражувањето објавено во списанието „Нејчр хјуман бихејвиор“ опфати 212 претходно објавени студии, со статистичка анализа на 85 студии кои вклучија возрасни и 52 кои исто така вклучуваа и новороденчиња.

„Нашата работа илустрира дека интервенциите на допир се најпогодни за намалување на болката, депресијата и анксиозноста кај возрасните и децата, како и за зголемување на телесната тежина кај новороденчињата“, тврдат истражувачите.

Анализата покажа дека луѓето доживеале слични придобивки за нивното физичко здравје кога биле допрени од други луѓе или предмети – како што се социјални роботи или тешки ќебиња.

„Ова значи дека треба да направиме повеќе истражувања за потенцијалот на тешките ќебиња или социјалните роботи за подобрување на човековата благосостојба, особено за време на ситуации кои го ограничуваат контактот, како што е неодамнешната пандемија на Ковид-19“, рече Хартман.

Позитивното влијание врз менталното здравје е поголемо со човечкиот допир отколку со допирот со предмети – веројатно, затоа што вклучува контакт кожа на кожа.

Допирањето на главата е поврзано со поголеми здравствени придобивки од допирањето на други делови од телото.

Научничката Маријана фон Мор, која не учествуваше во истражувањето, верува дека ако идните роботи можат попрецизно да ја реплицираат текстурата и топлината на човечката кожа, тие би можеле да обезбедат споредливи придобивки за менталното здравје како човечкиот допир.