Ваучер-системот преку кој функционираше целокупниот македонски спорт во последните години е укинат и тоа донесе силни недоумици и реакции од клубовите и федерациите.

Агенцијата за млади и спорт ја смируваше ситуација информирајќи дека ваучерите не се укинуваат, туку ќе се промени начинот на реализацијата. Сега, државата директно ќе ги исплаќа средствата на спортските субјекти кои ќе имаат право на спортски ваучер.

На денешната прес-конференција првиот човек на АМС, Наумче Мојсоски информираше дека веќе е подготвено новото предлог законско решение и тоа треба да биде изгласано во Собрание најдоцна до февруари следната година.

„АМС заедно со Министерството за правда (МП) веќе го подготви новото предлог-законско решение со кои ќе се уреди новиот начин на реализација на спортскот ваучер. Очекуваме законот набрзо да помине во МП, па да влезе во собраниска процедура и да биде изгласано од пратениците најдоцна до февруари следната година. Критериумите ќе бидат малку позатегнати и парите ќе одат директно на клубовите и федерациите, но јасно е дека повторно ќе има помош како и досега за сите клубови и федерации.

Со оваа мерка, поддршката во спортот ќе продолжи, а ваучер-системот ќе се унапреди и сите кои имаа потешкотии од било кои причини при реализација на спортскиот ваучер, тој проблем веќе ќе го немаат. Злоупотребите од нечесните компании кои бараа услуги за реализација на спортскиот ваучер, ќе престанат и сите средства ќе се користат за унапредување на спортот и за потребите на спортистите. Ваучерите ќе се реализираат на двапати во годината, дел во март и остатокот во јуни“, изјави Мојсоски.