Фармацевтската компанија „Модерна“ објави дека добила целосно одобрение од американската Администрација за храна и лекови (ФДА) за употреба на нејзината вакцина против коронавирус кај лица постари од 18 години, јавија американските медиуми.

Вакцината беше одобрена за итна употреба уште во декември 2020 година, а „Модерна“ во август минатата година објави дека процесот на аплицирање за целосно одобрување на вакцината е завршен.

Вакцините на „Фајзер/Бионтек“ добија целосно одобрение во САД минатата година. Вакцината на „Модерна“ е одобрена за употреба во повеќе од 70 земји, вклучително и Канада и земјите-членки на Европската унија.