Учениците кои оваа учебна година ќе одат во првите шест одделенија во основните училишта и во прва година во средните училишта, ќе следат настава во училница додека останатите ученици ќе учат онлајн со консултации во училиште на секои две недели, објави Министерството за образование на Црна Гора. Наставата треба да започне на 1 октомври.

Според усвоените протоколи, истовремено не смее да има повеќе од 15 ученици во училницата, во една клупа ќе може да седи само по еден ученик и потребно е да се одржи физичко растојание од најмалку два метра.

Министерството соопшти дека часовите за учениците од основните училишта ќе бидат 30 минути, ќе има максимум четири часа, а часот за учениците од средните училишта ќе трае 30 минути и ќе има најмногу шест часа во денот.

Министерството додаде дека сите проверки на знаење, тестови, контролни и писмени задачи за сите ученици ќе бидат организирани исклучиво во училиштето, согласно мерките. Сите ученици од средните стручни училишта од која било година ќе изведуваат вежби и практична настава во училиште или кај работодавачот, согласно мерките.

– Персоналот и учениците доаѓаат на училиште со маски на лицето и се препорачува да имаат најмалку уште две маски за резерви. Носењето на визир се препорачува како подобрена мерка за луѓе кои имаат значителни коморбидни состојби и за оние кои не толерираат носење маски од медицински причини. За лица кои, од медицински причини, не можат да толерираат носење ниту маска ниту визир, можноста за заштита ќе се разгледува индивидуално за секој случај”, се вели во соопштението на црногорското Министерство.

Се додава дека ниту учениците, ниту наставниот персонал нема да одат во училиште доколку имаат симптоми на респираторна или цревна инфекција, треска, губење на чувство за мирис и/или вкус, како и лица на кои им е издадено решение за карантин или домашна изолација.

Како што е наведено, директорот на училиштето може да одлучи дека, доколку има просторни капацитети во училиштето и со почитување на мерките, може да се реализира настава со поголем број ученици, за што Министерството треба да информира.

Тие додаваат дека без оглед на тоа што некои ученици ќе посетуваат училиште, Министерството за образование им обезбеди на учениците од сите одделенија на основните и средните училишта снимен материјал за најголемиот број предмети, што ќе се емитува на ТВЦГ2 и МНЕ спорт од 1 октомври