Во Културно-информативниот центар – Скопје на 31 јануари, во 20 часот, во „Салон 19:19“, самостоен концерт ќе одржи пијанистката Анастасија Кочева. На програмата се три композици за пијано од Франц Шуберт и делото „Огледала“ од Морис Равел.

Анастасија Кочева (1997) е дел од новата генерација активни и надоаѓачки пијанисти на домашната сцена. Своето формално музичко образование го започнува на 7-годишна возраст, а го заокружува на Факултетот за музичка уметност во Скопје, во класата на д-р Ана Гацева, каде дипломира и магистрира. Добитник е на повеќе награди и признанија на голем број државни и меѓународни натпревари.

Освен на класичната, таа е активна и на алтернативната и независна музичка сцена, создавајќи авторска електронска музика, како и со учество во различни импровизациски формации.

Минатата година го објави нејзиниот деби албум насловен „Тар“, во издание на „Стотројка“ – издавачка куќа зад која стои независното музичко радио „Канал 103“.

Моментално работи како наставник по пијано во ДМБУЦ „Илија Николовски-Луј“ во Скопје.