ВАР технологијата не го донесе она што се очекуваше од неа и треба да се укине, со што судиите би добиле поголеми овластувања, смета поранешниот претседател на УЕФА, Мишел Платини.

Еден од најшарените европски фудбалери во историјата смета дека фудбалот ја загубил душата по воведувањето на модерната технологија која ја убива динамиката на играта.

– Веднаш би ја укинал ВАР технологијата. Можеби би ја оставил само за офсајд ситуации, каде треба да се исцртаат линии за да се види дали играчот е во недозволена позиција, а сето останато би оставил на судиите сами да одлучат. Судиите треба да бидат тие што одлучуваат дали било фаул или не – изјави легендарниот Французин во изјава за италијанските медиуми.

Платини во разговорот со италијанските новинари зборуваше и за односот со неговиот поранешен клуб Јувентус од Торино.

– Не гледам многу Серија А, бидејќи во Франција нема телевизија што ги пренесува тие натпревари. Искрено, не знам како да наведам тројца играчи од овој клуб, но среќен сум кога ќе слушнам дека Јуве победил. Тоа е е клуб во кој поминав многу добри времиња, но тоа беше многу одамна, пред повеќе од 40 години – рече Платини.