Министерот за одбрана Владо Мисајловски и министерот за внатрешни работи Панче Тошковски денеска во Истанбул се сретнаа со министерот за национална одбрана на Република Турција, Јашар Ѓулер.

На средбата, која се одржа на маргините на саемот за воена индстрија во Истанбул – IDEF 25, како што информира Министерството за одбрана, била истакната долгогодишната активна одбранбена соработка базирана на заедничката визија за одржување на стабилноста и безбедноста на регионот и развојот на двете земји.

Заклучокот од средбата е дека и двете страни продолжуваат да го јакнат партнерството преку размена на знаење и стручност во сите области.

Министерот Мисајловски се осврнал и на последната нова и софистицирана опрема која стана дел од арсеналот на Армијата – хаубиците „Боран“ од турско производство кои се дел од декларираната артилериска батерија на Лесната пешадиска баталјонска група.

„Македонската Армија е убедена во квалитетот на турската воена индустрија. Македонската Армија минува низ досега најинтензивен процес на модернизација и опремување, што несомнено е инвестиција во безбедноста на македонските граѓани. Посилна Армија значи и посигурна и побезбедна колективна одбрана во НАТО“ изјавил Мисајловски на средбата и упатил благодарност за континуираната поддршка од страна на Турција особено во развојот на армиските капацитети.

Во рамки на посетата на Турција и учеството на саемот за воена индустрија IDEF 25, министерот Мисајловски вчера се сретна и со претседателот на Агенцијата за одбранбена индустрија на Турција, Халук Ѓорѓун, со кого разговарале за развојот на воената индустрија и потребата од зголемени инвестиции во оваа област, како начин за зацврстување на безбедноста на сојузниците.