Министерот за здравство доктор Илир Демири завчера го поништил тендерот за набавка на единица за централна подготовка на лекови со КАТО софтвер за потребите на ЈЗУ Универзитетска клиника за радиотерапија и онкологија, покажуваат документите до кои дојде ,,Слободен печат”. Само една фирма се пријавила на тендерот и тоа е всушност единствената фирма која во Европа може да го оспособи системот. Но, нивната понуда од страна на Министерството за здравство е одбиена, а постапката за јавна набавка била поништена со образложение дека претставникот на фирмата документите ги потпишал рачно, а не со електронски потпис.

Станува збор за фирмата Хоспитал Плус Д.О.О Србија, која за да го стави во целосна функција КАТО системот на Онкологија побарала 419 илјади евра. Со тие пари, Клиниката за онкологија за една година би заштедила 970 илјади евра на лекови, велат нашите извори кои работат со овој систем. Системот за централна подготовка на цитостатици со КАТО лиценца овозможува секоја подготовка на лек или цитостатик да се следи на камера односно да се снима, вијалите да се искористуваат максимално, да нема опасност од манипулација со дозите и точно да се знае каде се лековите во кое било време од моментот кога ќе влезат во болницата додека да се издадат на пациентот. Исто така, предноста на системот кој се користи во стотици болници во развиениот свет, е во тоа што претставува кабинет што е безбеден за персоналот, кој сега ги подготвува лековите рачно, а не со гравиметриска вага како што би било случај кога КАТО системот би бил во употреба. Во меѓувреме, фирмата која е одбиена на тендерот поради рачно потпишаните документи, завршила со монтажа на вакви системи во повеќе држави од регионот, а последно и во Обединетите Арапски Емирати и во Саудиска Арабија. Претходно фирмата монтирала КАТО  системи во Грција, Германија, Австрија, Романија, Бугарија, Хрватска итн.

Но, во Македонија не поминале на тендерот.

Одлуката за поништување на постапката за јавна набавка доаѓа по препорака од стручна комисија што му сугерирала на министерот Демири да го поништи тендерот. Српската фирма е таа која го инсталирала оној дел од КАТО системот што се наоѓа на клиниката и во 2017 година пред системот да биде демонтиран и заборавен одржала обука со фармацевтка од Белград за петнаесетина медицински сестри да знаат како да го користат.

Во образложението зошто фирмата Хоспитал Плус Д.О.О Србија е одбиена се наведува дека ,,доставените изјави од фирмата се со рачен, а не со дигитален потпис“. Наведено е и дека ,,доставената потврда од Агенцијата за привреден регистар (еквивалентна на македонскиот Централен регистар) е нецелосна. Се додава дека ,,не е доставен документ со кој се докажува дека не е изречена прекршочна санкција забрана за вршење професија, дејност или должност“, ниту пак ,,изјава заверена на нотар ако некои документи не се издаваат“.

Во другите причини за поништување на тендерот е и тоа што фирмата не ставила електронски потписи на изјавите што ги доставила дека ќе доставува резервни делови и сервис најмалку 5 години, туку изјавите ги потпишала рачно.

Не биле доставени ни каталози со што може да се утврди исполнувањето на минималните услови од техничките спецификации. Фирмата доставила и изјава дека опремата ќе биде нова, фабрички составена во оригинална фабричка амбалажа и првпат ќе се отпакува на Клиниката, арно ама и таа изјава не била доволна за стручната комисија во Министерството за здравство, зашто немала дигитален, туку своерачен потпис.

Фирмата, според Министерството за здравство, морала да ги потпише документите со дигитален сертификат и тоа е главната причина поради која понудата се отфрла. Министерот Демири пак, дигитално ја потпишал одлуката за поништување на тендерот.