По одличниот концерт на Зарина Првасевда во рамките на мини-фестивалот „Светско, а наше“ минатата сабота, низата концерти кои го исполнуваат поткровјето на „Јавна соба“ продолжува на 2 март, во 21 часот, со настап на битолската група „Фолтин“.

Музиката на „Фолтин“ е непредвидлива и предизвикувачка, надреална, страсна и духовита, динамична, полна со изненадувања и спојува многу жанрови.

Групата постои од 1996 година. Зад себе имаат девет самостојни албуми, музика за преку триесетина театарски претстави, за десетина филмови, меѓу кои и кандидатот за Оскар, „Медена земја“, и интернационално најнаградуваниот филм „Исцелител“.

Со концертни настапи и театарски перформанси во живо гостувале во Хрватска, Италија, Австрија, Словенија, Србија, Босна и Херцеговина, Албанија, Бугарија, Франција, Германија, Унгарија, Израел, Русија, Црна Гора, Англија, Либан, Холандија, Белгија, Турција и Чешка.

Освен на македонски, англиски и француски јазик, пеат и на таканаречен „спонтан eсперанто“, имагинарна смеса или фонетска имитација на светските јазици.

„Фолтин“ себеси се опишуваат како псевдо-емигрантско кабаре и работат во состав: Пеце Николовски – кларинет и усна хармоника, Бранислав Николов – гласни и други жици, Пеце Трајковски-Брада – дирки, гитара, перкусии, Гоце Јованоски – бас и Славчо Јовев – тапани.

Фестивалот „Светско, а наше“, кој се одвива секоја сабота во „Јавна соба“, има за цел да претстави македонски групи кои имаат успех на светската музичка сцена и досега настапија „Калата“ и Зарина Првасевда.